Сагаа һарын уулзалга Ивалгын дасанда
«Эхэ хэлэн – манай баялиг» гэһэн наадамда оло удаа шалгаран гараһан буряад хэлэнэйбагшанартай Сагаа һарын хуралнуудай үедэ Ивалгын дасанда үнгэрбэ.
Буддын шажантанай заншалта Сангхын дурадхалаар эмхидхэгдэһэн «Эхэ хэлэн – манай баялиг» гэһэн Бүгэдэ Буряадай һургуулинууд хоорондын наадам 9-дэхи удаа үнгэрөөд байна. Хэлэн гээшэ хүнүүдэй хоорондоо харилсаха, бодолоо андалдан ойлголсохо зэбсэг гэжэ мэдэнэбди.
Манай буряад хэлэнэй лексическэ удха хоёр ехэ бүлэг болгон хубаардаг: бүгэдэндэ ойлгостой үгэнүүд (ниитэ үгэнүүд), нютаг үгэнүүд (нэгэ нютагта ойлгостой хэлэн).
Энэ наадамай зорилго хадаа нютаг хэлэнүүдые алдангүй, бүгэдэ буряадуудтаа ойлгостой, һонирхолтой болгохые оролдохо, угсаатанайнгаа хэлые хүгжөөжэ, буряад хэлэнэйнгээ нөөсэ баяжуулха гэһэн байна. Энэ наадамай ябаса хангаха хэрэгтэ буряад хэлэ, уран зохёол заажа ябаһан багшанар лэ гол хүсэн болоо гэжэ мэдээжэ. Багшанарай мэдэсэһээ,хүсэлһөө,эрмэлзэлһээ наадамай дүн гарадаг гэжэ эли.
2016 оной 2-дохи сарын 17-до 24-дэхи Хамба Лама Дамба Аюшеев «Эхэ хэлэн – манай баялиг» гэһэн наадамда оло удаа шалгаран гараһан буряад хэлэнэй багшанарые уриба. Эдэ хэд бэ гэхэдэ: Сэлэнгын аймагай Жаргалантын дунда һургуулиин багша Халзанова Арюна Юрьевна, Хориин аймагай Ааланай дунда һургуулиин буряад хэлэнэй багша Ширапова Баирма Шираповна, Сэлэнгын аймагай Ноёхоной дунда һургуули багша Болхоева Санжид-Дулма Базаровна, Яруунын аймагай Үльдэргын дунда һургуулиин багша Жамбалова Баярма Базаргуруевна, Зэдын аймагай Цагаатайндунда һургуулиин багша Балданова Баярма Дашиевна.
Уулзалга дээрэ Хамба лама эдэбхитэй багшанарые амаршалаад,
хэжэ ябаһан ажалайнгаа удха зүбөөр ойлгожо, бүхы хүсэлөө, дүршэл шадабирияа һурагшадайнгаа хүгжэлтэдэ зорюулжа ябаһандань баярые хүргэбэ.