Хүндэтэ һурагшад, багшанар! Танай табиһан асуудалнуудта харюунууд
— Оршуулһан хүдэлмэринүүдээ абаад ерэхэт. Жюридэ өөһэдөө шэлээд, нэгэ оршуулгаяа уранаар хөөрэжэ үгэхэт.
— Үгтэһэн 130 блиц-асуудалнуудта урда наадамуудай үшөө 10 асуудалнууд нэмэгдэхэ. Финалда орогшодтнай 2 минутын туршада ами аминдаа асуудалда харюусаха (үгтэһэн саг соо хэн олон зүб харюу үгэнэб гэһэн урилдаан)
— «Дуулаһан-шэхэндэ….» гэһэн урилдаандаа хошон, хүхюун зугаа дэлгэхэт, тиихэдээ заатагүй радиодо дамжуулга хэжэ байнабди гэжэ һанаад хөөрөөрэйгты (хандалга, мэндэшэлэлгэ, хаанаһаа дамжуулга ябанаб, хэн хөөрэнэб, баярай үгэ … өөрын онсолиг оруулха гэжэ оролдогты даа)
— Зурагаар хөөрөө хэхэдээ, хэн уран зураашын хүдэлмэри абаабта, юундэ, юугээрээ анхарал татааб … гэжэ тон тобшоор мэдээ үгөө һаатнай, һайн байгаа гү?
— Шэнжэлэлгын хүдэлмэри хэхыетнай сэдэбүүд үгтөө. Эндэ заатагүй хэнэй номдо хандаһанаа, хэнтэй хөөрэлдэжэ, энэ мэдэсэ абаһанаа тэмдэглэхэ хэрэгтэй. Тобшоор хэлэбэл, шэнжэлэлгын хүдэлмэриин түхэл алдахагүй гэжэ оролдогты
— Хамба ламын тэмсээндэ ехэнхи асуудалнууд Этигэл хамбын һургаалнуудаар байха
— оёдолоо дүүргэһэн басагад сүлөөтэй байха, дефилеэдэ хабаадахаа бэлдэхэ, бэшэмнай хэжэ байһан ажалаа дүүргэхэ
— «Уран баримал» шэглэлээр хүдэлхэ һурагшадай гэртээ хэһэн хүдэлмэри сэгнэгдэхэгүй
— Уран дархашуул бүтээл тухайгаа хөөрэхэ, ажалайнгаа удха, һубарил тухай сүлөө хэлэхэ аргатай байха
— Жэлэйнгээ дүн гаргаһан ехэ наадамдаа олоороо ерэхэ гэжэ хүлеэхэбди таанадаа