Хүндэтэ һурагшад!
11-дэхи наадамда үгтэһэн хэдэн даабаринуудаар тодорхойлго хэе даа.
1) Блиц-урилдаан. Танай анхаралда үгтэһэн асуудалнууд (илангаяа Хамба Ламын суглуулбаринуудһаа) орёошог удхатай байха. Асуудалнууд дээрэ бодомжолходоо, заатагүй багшанартаяа, гэртэхинтэеэ, шэрээтэ ламатаяа зүбшэн хэлсэгты, номой сан соохи материал шэнжэлэгты. Харюунуудтнай нэгэ үгөөр хизаарлагдахаар бэшэ һэн тулань, тодо бодолтой богонихон мэдүүлэлнүүдээр үгтэхэ болоно. Тус урилдаанай 2-дохи хуби «Байгал үргэн далаймнай…» гээд нэрлэгдээ Харюунуудаа бэдэрхэдээ, «Буряад хэлэн» гэһэн сахим һураха номдоо хандахат.
2) «Уран бэлигтэй,ульгам хэлэтэй». Эндэ танай һонорто 3 түхэлэй даабаринууд үгтөө (сэхэ оршуулан дамжуулха, өөрын сюжет тааруулан хөөрэхэ, шэнэ «Ералаш» зохёохо). Үхибүүд, хэдэн үеын һурагшад «Ералаш» түхэлэй өөрын уран һайханай сэтгүүлтэй болохо тухай хэлсэдэгшье, туршалга хэдэгшье байһан.
3 )»Хэнэй хэлэн баян бэ?». Энэ нааданда таанадта Даян дэлхэйһээ зурагууд дурадхагдаха. Сэдэбээр үгтэһэн зурагуудые хараад, зүбөөр нэрлэхэ гэһэн даабари 1 шатадаа абахат, саашаа урилдаанай гуримаар үнгэрхэ. Зурагуудаар холбуулалнуудые зохёохо даабари зүбөөр дүүргэхые оролдохо хэрэгтэй. Хуряангы мэдүүлэлнүүдые холбуулалтай худхаха ушар дайралдадаг бшуу даа. Һүүлшын шатада гарагшад үгтэһэн зураг тайлбарилһан мэдүүлэлнүүдээр харюу үгэхэт, тиимэһээ даян дэлхэйнгээ амитадай, ургамалай… аймагууд тухай юрэнхы мэдэсэтэй байха зэргэтэйт.
4) «Оньһон үгэ оностой,олоной үгэ тудастай». Тус урилдаанда хэрэглэгдэхэ оньһон үгэнүүдтээ анхаралтай хандагты. Эндэтнай оньһон үгэнүүдһээ гадна олоор хошон үгэнүүд үгтэнхэй,тиимэһээ удхаараа һонин.һургаал боломоор оньһон үгэнүүдыень шэлэн сээжэлдэгты . Үгтэһэн сэдэбүүдээр танай нютагта хэлэгдэдэг сэсэ мэргэн бодол-үгэнүүдые суглуулаад сээжэлдэбэтнай эрхим һэн.
5) «Уянгын шүрэ үлхэе». 2 минутын туршада өөһэдынгөө оршуулһан Л.Толстойн үгүүлэлнүүдһээ нэгыень сээжэлдээд, уран һайханай номер бэлдэхэ болонот. Эндэ бүлэгөөршье,ганса гансаараашье бэлдэхэдэтнай болоно Нютаг хэлэнэй аялга, үгүүлбэри дүүрэн харуулха шухала Эгээл эрхим хүдэлмэринүүд миндаһан дээрэ бэшэгдэхэ, саашадаа радиодамжуулгануудта орожо, олоной һонорто дурадхагдаха.
6) Хамба Ламын шан абалгын тэмсэлдэ «10 хангал» гэһэн сэдэб нэмэнэ. Үгтэхэ тест соотнай урда үгтэһэн бүхы сэдэбүүдээр нэгэ хэды асуудалнууд үгтэхэ,харин гол асуудалнуудтнай «10 хангалаар» байха. Уридшалан бэлэн тестнүүд танда үгтэхэгүй, тиимэһээ сайт дээрэ үгтэһэн номойнгоо санда хандагты.
Таанадтаа дамжуулха хүсэлнүүдни иимэл даа, асуудалай гараа һаань, хонходооройгты
Энэ удаа таанартаа даабари дурадхахадаа, аба эжынэрэйнгээ хүсэл бэелүүлмэ хабатай залуушуул урган ябана гэһэн бодолоо баталуулха һанаатай байнабди.
Зохёохы хүдэлмэридэтнай амжалта хүсэнэбди!