ЭРДЭМТЭДЭЙ ДУРАДХАЛНУУДЫЕ ХЭРЭГЛЭН АРҺА ЭЛДЭЛГЭ
Ивалгын дасанда үнгэргэгдэжэ заншалта болоһон «Эхэ хэлэн – манай баялиг» гэһэн һургуулинууд хоорондын урилдаануудта басагадай хуби заяанда ушардаг гол үүргэнүүдэй нэгэн – оёлго оролсодог.
Урданһаа нааша арһа шүрбэһөөр оёлго гээшэл дэлгэрэнги байгаа, энэ оёлгодоо хэрглэхэ арһаяа өөһэдөөл элдэжэ бэлдэдэг байһан гэжэ мэдээжэ. Мүнөө энэ хүшэр ажалые эрдэмтэдэй дурадхалаар хэдэг бологдожо байна, дасанда үнгэрдэг мүрысөөнүүдтэ тон иимэ аргаар элдэгдэһэн арһаар оёлго хоёр удаа үнгэрөөд байна. Саашадаашье энэл аргаяа хэрглэжэ, ажабайдалдаа хэрглэхэ саг ерэбэ, ушар тиимэһээ тэрэ шэнэ онол аргануудые үшөө дахин бүгэдэ уншагшадайнгаа анхаралда дурадханабди, тиихэдээ харуулхашье арга бии болоо.
Нааданай гуримууд сооһоо:
«Уран гартан.
Гэртээ хониной гурбан арһа элдэхэ даабари танда үгтэнэ. Арһанда тусхай һубаряагаар эдеэ түрхижэ, шударжа, сэбэрлэжэ, угаажа болбосоруулаад, юумэ оёхоор болгохые арһа элдэхэ гэдэг.
Энэ хүдэлмэри яажа эмхидхэхэб гэжэ тодорхойлоё:
— гурбан арһанай нооһыень хайшалаад, дабһатай уһан соо шиихаад, 7-8 час соо бариха (1-2 кг дабһан, 3 арһанай сүлөө эрьелдэжэ байхаар уһан хэгдэхэ);
— уһанһаа арһануудаа гаргаад, хүрьһыень (мездра) хюһаха, удаань тусхай бодос (раствор) арһандаа түрхихэ (1 литр уһанда 50 грамм 70% уксусна кислота. Уһанай шэрүүн байбал, 200 гр. сода хэжэ уһаа зөөлэрүүлхэ). Һүүлдэнь арһаяа үшөө 6 часай туршада уһан соо байлгаха;
— арһаяа сэбэр уһан соо угаагаад хатааха, удаань дотор талаһаань эмульси түрхихэ. Нэгэ арһандатнай 200-300 грамм эмульси орохо. Арһа элдэлгэдэ тон хэрэгтэй болохо зүйл – эмульси ВСГУТУ-гэй «Технология кожи и меха» гэһэн факультедтэ хандажа абахада болохо. Утасайнь дугаар: 8-9021-67 68 24; 8-3012-417-222;
— арһаяа сэбэрлэхэ, халимнаха (снимать остатки жира со шкуры). Һүүлдэ арһандаа түрхихэ эдеэ бэлдэхэ: 1 литр халуун уһанда 10 грамм 12-дохи номерой индустриальна тоһо нэмэнэбди, дээрэнь 1 грамм превоцела, 2-3 дуһал скипидар нэмээд, халуун уһанда худхаха. (12-дохи номерой тоһоной үгы байбал, 20-дохи номерой индустриальна тоһо адли хэмжээгээр 5-дахи номерой тоһонтой холижо болоно). Энэ бэлдэһэнээ арһандаа түрхихэ, гараараа эмиржэ, арһаяа элдэхэ хэрэгтэй. Индустриальна тоһо, превоцелла тухай нютагайнгаа шэрээтэ ламанарта, мүн Зоригто ламада энэ утасаар +7 983 429 98 55 хандан, зүбшөөл абажа болоно.
Хэрэглэһэн зүйлнүүд юундэ туһатайб гэжэ анхарагты!
– Уксусна кислота – арһаяа элдэб микробһоо сүлөөлнэ;
– Эмульси – арһаяа бүхэ болгоно, мүн зөөлэрүүлнэ;
– Индустриальна тоһон – арһа зөөлэрүүлнэ;
– Превоцелла – тоһо, өөхэнһөө сэбэрлэнэ;
– Скипидар – арһандаа хэрэгтэй бодос шэнгээнэ, зөөлэрүүлнэ».