Хүндэтэ нүхэд!
Оросой Холбооной Буддын шажантанай заншалта Сангхын эрхилһэн «Эхэ хэлэн-манай баялиг» гэһэн наадам 2014-2016 онуудай хугасаада 12 удаа үнгэрөө. Наадамай зорилго, ябаса, эрилтэ тодоор үгтэһэн байгаа. Тэрэнээ яажа дүүргэжэ байһан тухайгаа наадам бүхэнэй һүүлдэ Буряад Уласай мэдээсэл тараадаг эмхинүүдэй хүсөөр олондо дуулгагдаа, бүридхэгдөө. Энэ һуралсалай жэлэй һүүлшын наадам дээрэ Хамба лама Дамба Аюшеев энэ урилдаанай үргэлжэлтэй байха тухай хэлээ.
Наадамай дүримдэ бага зэргэ хубилалтанууд оруулагдаха. Тодорхойлбол, бүлэгүүдэй бүридэл ондоо болгохо. Хүндэтэ манай багшанар,һурагшад,түрэлхид энэ намартаа эхилхэ наадамаа үшөө эршэтэй, удхатай, урилдаанай ульһатай болгохын тула хабаадагшадайнгаа мэдэсэ, һонирхол үргэхэ ёһотойбди гэжэ ойлгостой. Тиимэһээ удаадахи наадамда ерэгшэд элдэб харилсаанһаа дулдыдаһан бүлэгүүдые бэлдэхэдэ болохо: дүтын түрэлэй зоной бүлэг, нэгэ обогойхид, суг хүдэлдэг ажалшадай хүүгэдэй бүлэг гээд, өөһэдынгөө сэдьхэлдэ дүтэ, харилсахада зохид зонуудаа тааруулагты. Бүлэгүүдээ уранаар нэрлээд, ямар нютаг түлөөлһэнөө тэмдэглээд, наадамай хаягта мэдүүлгэеэ намартаа эльгээхэт. Наадамай хүгжэлтэдэ манай һурагшадай эжы абанар ехэтэ нүлөөлнэ гэжэ ойлгонобди. Энэ намарһаа эхилхэ наадамда ерэгшэдые ганса багшанар хүтэлхэ бэшэ, мүн энэ үүргэ түрэлхидтэ, ажахын хүтэлбэригшэдтэ даалгагдаха. Иигэжэ олоороо шармайжа, орхиһон, мартаһанаа тэхэрюулхэ гэжэ оролдоёл даа. Үхибүүд энэ наадамда ерэхэдээ, ганса буряад хэлэеэ шудална бэшэ, үшөө Буддын шажанай нангин һургаалнуудтай, эртэ урдын уран зохёолнуудтайнь танилсана. Хүүгэдэй 4 тэгшэ хүмүүжэлгэдэ асари ехэ нүлөө үгэдэг ойлгосо — амидаралай гол болодог хэлэн, шажан, нютаг юм. Эрдэм шэнжэлгын замда гаралгадань ёһотоор нүлөөлхэ 3 шухала зүйлнүүд тухай мэдээ наадамда хабаадагшадта тодоор үгтэнэ.
Зунай даабари болгон үгтэһэн «Сагаан Дара эхын магтаал» танай һонорто табигдаба http://ehehelen.ru/sagaan-darhin-sedhel-mete-hurdyn-magtaal-xiii-naadam/, бэшэ даабаринууд сентябрь һарын эхеэр тодорхойлогдохо.