Захааминай аймагай Бортойн дунда һургуули
Соктоева Баирма, 10-дахи ангиин һурагша,
Багшань: Цыденжапова Дарима Долгоржаповна
Би хадаа, Борто һайхан нютагай, хүрхүүд омогой Соктоев Донидой басаган Баирма 10-дахи ангиин һурагша гээшэб. Һургуулидаа гансал 4-5 гэһэн сэгнэлтэнүүдээр һурадагби. Түрэл буряад хэлэндээ дуратайб. Тиимэһээ, буряад хэлэеэ яажа хүгжөөхэб гэһэн һанаа бодол сэдьхэлыемни зобоодог. Буряад хэлэн бидэндэ, буряад зондо ехэл сэнтэй гэжэ тоолонобди. Юундэб гэхэдэ, бидэниие балшар бага наһанһаа, түрэл хэлэндэмнай эжы абамнай һургаа. Наһаяа хүсэжэ, һургуулида ороходомнай, түрүүшын багша маанадта “а” үзэгтэй танилсуулаа. 5-дахи ангида ороходомнай, буряад хэлэнэй багша халан абажа, бидэниие сэбэр буряад хэлэн дээрэ хөөрэлдэхыемнай һургаа, һурганашье. Эхэ, үндэһэн хэлэеэ магтажа, үргэжэ ябаха манай нангин уялга. Эхэ түрэл хэлэмнай ульгам нугархай, урданай ёһо заншалые уудалха, дамжуулха аргатай. Хүсэ шадалаа туршажа, олон мүрысөөнүүдтэ хабаадажа, түрүү һууринуудые эзэлдэгби. Жэшээнь, жэлдээ үнгэргэгдэдэг “Минии тоонто Захаамин” гэһэн конкурсдо хабаадажа, шүлэг рассказуудни аймагай болон республикын сонин ба сэтгүүлнүүдтэ толилогдожо, оло дахин түрүү һууринуудые эзэлээб. Тэрээнһээ гадуур “Эдир Дангинада” хабаадажа, өөрынгөө уг гарбал мэдэхэһээ гадна, уран гоёор хөөрэжэ һурааб. Оло дахин эрдэмэй-практическа хуралдаануудта хабаадажа, нютагаа түлөөлжэ Улаан-үдэдэ “Хонгодориада” “Эмтэй домтой Улхансагнай” гэһэн сэдэбээр хөөрөө хэжэ, һайшаал магтаалда хүртөөб. Тиимэһээ, би хадаа буряад хэлэеэ хүгжөөлгэдэ яһала хубитаяа оруулааб гэжэ һананаб. Юундэб гэхэдэ, буряад хэлэн дээрээ тордиһогүй һайнаар дуугаржа шадахаб, нэгэшье алдуугүйгөөр бэшэжэ шадахаб.
Бидэнэр булта үбгэ эсэгэнэрэйнгээ сахижа ябаһан ёһо заншал, түрэл хэлэеэ, түрэһэн тоонто нютагаа хамгаалжа, аршалжа ябаха уялгатайбди.