ЭХЭ ХЭЛЭН – СЭНХИР ДЭЛГЭСТЭ
Оросой Холбооной Буддын шажанай заншалта Сангхын үүсхэлээр һургуулинуудай һурагшад Ивалгын дасанда сугларжа мүрысэдэг болоһон гэжэ дуулаагүй хүн үгы юм бэшэ гү?
Эхилһэнһээ хойшо һургуулинууд 10 дахин суглараад байна. Мүрысөөнһөө мүрысөөндэ хабаададаг һургуулинуудай тоо олошорһоор олошоржо, һүүлэй мүрысөөнүүдтэ 90 шахажа байна гээшэ. Эрхүү можын, Үбэр-Байгалай хизаарай мүн Буряад ороной ехэнхи аймагуудай һургуулинууд хабаадана. Хүүгэдэй сугларха бүри нэгэ шангашаг шадалтай эбээн тэдхэгшэ олдоод лэ, энэ наадануудаа һаадгүй үнгэргэхэ арга олгоод лэ байна.
Эндэ онсолон хэлэжэ, бахархан баярлахаар ушар 7-дохи нааданһаа захалаад бии болоо бэлэй, ушар юуб гэхэдэ имагтал 7-дохи нааданда дээрэ хэлэгдэһэн шангашаг шадалтай эбээн тэдхэгшэдэй тоодо ороһон Буряадаймнай агаарай долгиндо болон сэнхир дэлгэстэ дамжуулагнуудые ябуулжа байдаг хамжаан (ГТРК «БУРЯТИЯ») наадануудта шэнэ маяг оруулаа. 7-дохи наадан заншалта ёһоороо дасанайнгаа ехэ һургуулиин танхим соо үнгэрөөд, хоёрдохи үдэртөө 19 сагһаа 21 саг болотор хоёр сагай туршада сэнхир дэлгэсээр сэхэ дамжуулга үнгэргэгдөө.
Сэнхир дэлгэсэй агаарай долгиндо гаралга гээшэ баһал ехэ мүнгэнэй гаргашатай юм гэжэ ойлгохо ёһотойбди. Тиигээд лэ 7-дохи, 8-дахи, 9-дэхи, 10-дахи наадануудай хоёрдохи үдэрнүүдтэ дасан дээрээ хабаадажа, һургуулинууд хоорондоо мүрысэдэг хүүгэд отог, нютагаараа 6 бүлэг боложо эблэрээд, мүн лэ мүрысөөнэй гуримаар хабаадана гээшэ. Ямар 6 бүлэг бэ гэбэл: Хори буряадуудай, баргажан буряадуудай, сэлэнгэ буряадуудай, эрхүү буряадуудай, хонгоодор буряадуудай, тиихэдэ Буряадай бүхы шахуу аймагуудһаа олон мянгаараа Улаан-Үдэ нүүжэ ерэһэн буряадуудай бүлэг (эдээнээ Хамба лама “эмигрантнууд” гэдэг).
7-дохиһоо хойшо үнгэрһэн дүрбэн наадануудые хараһан зоной һонирхол үндэр, буряад арадаймнай яряанай хэлэн хосоржо байна гэтэр иигэжэ һэргэжэ, тэрэ мүртөө хүгжэжэ байхадань арад түмэнэй бахархал ехэ. Энэ ушараар Буряадайнгаа телевидениин хамта олондо, захирал М. В. Урбаевада, буряад хэлэн дээрэ дамжуулгануудые бэлдэжэ, агаарай долгёор арад түмэндөө эльгээжэ байдаг бүхы сурбалжалагшад, найруулагшадта энэ хэрэгтэ хабаатайшуул, Хамба лама Дамба Аюшеев түрүүтэй эмхидхэлэй хороон ехын ехэ баярай үгэнүүдые мэдүүлжэ байна. Юуб гэхэдэ 7-дохи мүрысөөнһөө хойшо сэнхир дэлгэсээр сэхэ дамжуулгада ороһон хүүгэдэй отог нютагаараа хамтарһан дүрбэн мүрысөөнүүд бултадаа мүнөө юртэмсын бусайдаһан (интернет) соо оруулагдаа, һонирхоһон хүн бүхэнэй һаадгүй хараха арга олдобо гээшэ.
Наадануудые энэ буудалда орожо хараарайгты: http://bgtrk.ru/national/tv/ekhe-khelen-manay-bayalig/